Մարտի 23-ին «Հոդված 3» ակումբում մեկնարկեց «Կրթություն և վերականգնում․ Արցախից բռնի տեղահանված կանանց կարողությունների զարգացում» ծրագիրը
Մարտի 23-ին «Հոդված 3» ակումբում մեկնարկեց «Կրթություն և վերականգնում․ Արցախից բռնի տեղահանված կանանց կարողությունների զարգացում» ծրագիրը։
Առաջիկա 5 շաբաթների ընթացքում 20 արցախցի կանայք կստանան մի քանի ուղղություններով անհրաժեշտ գիտելիքներ եւ հմտություններ, որոնց շնորհիվ հետագայում հնարավոր կլինի հայաստանյան աշխատաշուկայում եւ սպառողական շուկայում ճիշտ կողմնորոշվել եւ ձեռներեցություն նախաձեռնել։
Նախորդ հանգստյան օրերի ընթացքում շահառուները մանրամասն քննարկեցին ֆինանսական գրագիտության նրբությունները, ձեռք բերեցին գիտելիքներ ֆինանսական անվտանգության, վարկային հնարավորությունների և ռիսկերի ճիշտ գնահատման, բիզնես փաստաթղթավորման, հարկատեսակների, վարչական իրավախախտումների և մի շարք այլ թեմաների վերաբերյալ՝ ֆինանսիստ, հաշվապահ և վարկային մասնագետ Նարինե Ասլանյանի հետ։
«Հանուն հավասար իրավունքների» կրթական կենտրոն ՀԿ-ն և «Հոդված 3» ակումբը, մշտապես կարևորելով պատերազմից եւ բռնի տեղահանումից տուժած կանանց եւ աղջիկների վերականգնման եւ տնտեսական հզորացման հարցերը, իրականացրել է բազմաթիվ ծրագրեր՝ աշխատելով ու աջակցելով ավելի քան 11000 արցախցի ընտանիքների։
Ավելի մանրամասն կարող եք ծանոթանալ և աջակցել մեր ծրագրերին այստեղ։
Սույն ծրագիրն իրականացվում է «Հանուն հավասար իրավունքների» կրթական կենտրոն ՀԿ-ի կողմից, «Կանանց ռեսուրսային կենտրոն» ՀԿ-ի հետ համատեղ՝ Շվեդիայի ֆինանսավորմամբ: