«Հոդված 3» էկո

Սկիզբ՝ 2018

[email protected]

 

 

«Հոդված 3» ԷԿՈ-ն «Հանուն հավասար իրավունքների» կրթական կենտրոն ՀԿ-ի համեմատաբար նոր նախագիծ է, որը, սկսվելով որպես սոցիալ-բնապահպանական կամավոր նախաձեռնություն, կարճ ժամանակահատվածում վերակերպվեց կազմակերպության առանցքային ուղղություններից մեկի։

Վերամշակումից մինչև բնապահպանական իրավունք, քաղաքային կանաչապատումից մինչև վերականգնվող էներգիա, թափոնների կառավարում և բնապահպանության ու գենդերի սահմանային խնդիրներ․ «Հանուն հավասար իրավունքներ» կրթական կենտրոն ՀԿ-ի բնապահպանական ռազմավարության և գործողությունների ծրագիրը ներառում է կազմակերպության գործունեությանը համապատասխանեցրած մի շարք տարրեր, որոնք ներդաշնակորեն ինտեգրվում են ընթացիկ նախագծերի համատեքստում։

 

 

 

Եվա Մարտիրոսյան
«Հոդված 3» ԷԿՈ-ի համակարգող

 Թափոնների հավաք ♻️

 

«Հոդված 3» ԷԿՈ-ն կատարում է թափոնների հավաք։ Եթե թափոնների ընդհանուր կշիռը 15+ կգ է՝ խնդրում ենք լրացնել հայտը։ Մեր կամավորները կկապվեն ձեզ հետ՝ դրանք վերցելու համար։

Եթե թափոնները 15 կգ-ից քիչ են՝ կարող եք բերել «Հոդված 3» ակումբ, Զարոբյան 32 (Չեխովի անվ․ դպրոցի հետնամաս) և թողնել բակի պատշգամբում (տարածքը միշտ բաց է)։

ԼՐԱՑՆԵԼ ՀԱՅՏԸ

«Օգնելով բնությանը՝ օգնեք բազմազավակ ընտանիքներին»

 

2020 թվականի մարտից «Հոդված 3» էկոն մեկնարկեց «Օգնելով բնությանը՝ օգնեք բազմազավակ ընտանիքներին» նախաձեռնությունը, որի նպատակն էր արտակարգ դրության օրերին աջակցել սոցիալապես խոցելի խմբերին։

Նախաձեռնության բաղադրիչը պլաստիկե իրերի ու թղթե թափոնների հանգանակությունն էր։ Թափոնները վերամշակման հանձնումից էլ գոյացած ողջ գումարն ուղղվեց սոցիալապես խոցելի ընտանիքների կոմունալ ծախսերի վճարմանը։

Նախաձեռնության երկու փուլերի արդյունքում աջակցեցինք 33 ընտանիքների՝ շուրջ 170 քաղաքացի Հայաստանի տարբեր մարզերից։ Կարողացանք վճարել սոցիալապես խոցելի ընտանիքների վերջին մի քանի ամիսների կոմունալ, ինչպես նաև ինտերնետի վարձավճարները։

Այս նախաձեռնությամբ կարողացանք թեթևացնել հարյուրավոր քաղաքացիների կենցաղային հոգսերը, իսկ երեխաները հնարավորություն ստացան շարունակել հեռավար կրթությունը։

ԷկՕզոն

 

Լայն սպառման ապրանքների արտադրությունից և որոշ արտադրական գործընթացներից մթնոլորտ են արտանետվում գազեր, որոնք կործանարար ազդեցություն ունեն երկրի օզոնային շերտի համար։

«ԷկՕզոն»-ը գոտի է, որտեղ այս խնդիրը վերակերպվում է արվեստի։

«ԷկՕզոն․ սառնարանային թափոնարվեստ» ցուցահանդես-նախագծի ընթացքում գործածությունից դուրս եկած սառնարանները, սառցեխցիկները, օդորակիչները կվերակերպեն հեղինակային արտ-օբյեկտների։ Կենցաղային տեխնիկայի նշված տեսակները վտանգավոր թափոն են համարվում, եթե դրանք անվնաս չեն օգտահանվում։ Այս սարքավորումների վերամշակման համար հատուկ պայմաններ են սահմանված, որոնք չպահպանելու հետևանքով վերնոլորտ են արտանետվում օզոնի շերտը քայքայող, շրջակա միջավայրի և մարդու առողջության համար վնասակար գազեր։

Նախագիծն իրականացնում է «Հանուն հավասար իրավունքների» կրթական կենտրոն ՀԿ-ը, ՀՀ շրջակա միջավայրի նախարարության և ՄԱԿ-ի արդյունաբերական զարգացման կազմակերպության (UNIDO) հետ համատեղ` «Ինստիտուցիոնալ համակարգի հզորացում և կարողությունների ստեղծում» ծրագրի շրջանակում: